लग्नास नकार दिल्याने उपनिरीक्षक महिलेची बदनामी 

वेब टीम पुणे : सतत घेतला जाणारा संशय, शिवीगाळ आणि मारहाणीला कंटाळून शहरातील एका महिला उपनिरीक्षकाने मित्राला लग्नासाठी नकार दिल्याने, त्याने तिला धमकावून सोशल मीडियावर बदनामी केल्याचा प्रकार समोर आला आहे.

या प्रकरणी पीडित उपनिरीक्षक महिलेने लोणीकंद पोलिस ठाण्यात फिर्याद दिली आहे. त्यावरून तिच्या ३० वर्षीय मित्रावर गुन्हा दाखल करण्यात आला आहे. फिर्यादी या पुणे शहर पोलिस दलात नेमणुकीस आहेत.

पोलिसांनी दिलेल्या माहितीनुसार, आरोपी फिर्यादीचा मित्र असून, त्यांनी लग्न करण्याचा निर्णय घेतला होता. मात्र, आरोपी फिर्यादीवर सतत संशय घेत असे. तसेच, सातत्याने शिवीगाळ आणि मारहाणही करत असेच. त्याच्या त्रासाला कंटाळून फिर्यादीने आरोपीशी लग्न करण्यास स्पष्ट नकार दिला. तेव्हा आरोपीने फिर्यादीच्या नातेवाइकांना फोन करून 'आमचे लग्न लावून द्या, नाहीतर मी आत्महत्या करीन. तुमच्यावर अॅट्रॉसिटीचा गुन्हा दाखल करेन,' अशी धमकी दिली.

त्यानंतर आरोपीने फेसबुक, यू-ट्यूब आणि व्हॉट्सअॅप आदी सोशल मीडियावर फिर्यादीसोबतचे फोटो आणि व्हिडिओ प्रसारित करून फिर्यादीची बदनामी करण्याचा प्रयत्न केला. त्यानंतर आरोपीने फिर्यादीला नोकरी सोडून दे, मला पाच वर्षांचा पगार दे किंवा आता लगेच माझ्याशी लग्न कर, अशा अटी घातल्या. तसेच, आरोपीने फिर्यादीचे फोटो आणि व्हिडिओ व्हायरल करण्याची भीती घालून फिर्यादीकडून वेळोवेळी पैसेही घेतले. या प्रकरणी फिर्यादीने सायबर पोलिसात तक्रार दिली होती. तेथून हा गुन्हा लोणीकंद पोलिसांकडे वर्ग करण्यात आला होता.