टिकटॉक स्टार कडून प्रेयसीच्या खुनाचा प्रयत्न 

 वेब टीम नागपूर : प्रेमात दगा दिल्याचा समज झाल्याने प्रियकराने साथीदाराच्या मदतीने अल्पवयीन प्रेयसीचे अपहरण केले. 'देख, अब मेरे साथ बेवफाई का अंजाम क्या होता हैं', अशी धमकी देत त्याने मोबाइलद्वारे चित्रीकरण करून ते इन्स्टाग्रामवर पोस्ट केले. याबाबत कळताच गुन्हेशाखेने वायुवेगाने पावले उचलून टिकटॉक स्टार प्रियकर व त्याच्या साथीदाराला अटक करून अल्पवयीन मुलीची सुटका केली.

समीर खान व त्याचा साथीदार साकित अशी अटकेतील आरोपींची नावे आहेत. साडेसतरावर्षीय मुलगी किरण (बदलले नाव) बीकॉमची विद्यार्थिनी आहे. साकित हा टिकटॉक स्टार असून, खासगी काम करतो. दोन वर्षांपासून समीर व किरणचे प्रेमसंबंध आहेत. १८ जूनला किरणचा वाढदिवस होता. तिने पार्टीत मित्रांसह समीरलाही आमंत्रित केले. यावेळी तिने समीरला 'भाव' दिला नाही. ती समीरसमोरच अन्य एक मित्राशी अधिक बोलली. प्रेयसीने आपल्याला 'धोका' दिला असा समज समीरचा झाला. वाढदिवसानंतर किरणनेही समीरसोबत बोलणे कमी केले. त्यामुळे समीरचा संशय अधिकच बळावला. त्याने साकितच्या मदतीने किरणला ठार मारण्याचा कट आखला. शनिवारी दुपारी समीरने किरणला कमाल चौकात भेटायला बोलाविले. किरण तेथे आली. समीरने तिला कारमध्ये बसविले, मारहाण केली. डायलॉगबाजी करीत त्याचे मोबाइलद्वारे चित्रीकरण केले. ते त्याने इन्स्टाग्रामवर अपलोड केले. समीर हा किरणला घेऊन विटाभट्टी चौक परिसरात आला.

दरम्यान, या चित्रीकरणाबाबत पोलिस आयुक्त अमितेशकुमार यांना माहिती मिळाली. पोलिस आयुक्त अमितेशकुमार यांनी गुन्हेशाखेचे अतिरिक्त पोलिस आयुक्त सुनील फुलारी, उपायुक्त गजानन शिवलिंग राजमाने यांना मुलीची सुटका करून आरोपींना अटक करण्याचे निर्देश दिले. राजमाने यांनी वायुवेगाने पावले उचललली. सायबर सेलच्या मदतीने समीरचा शोध सुरू केला. संपूर्ण गुन्हेशाखा पोलिसांना सक्रिय केले. दरम्यान विटाभट्टी चौक परिसरातील एका निर्जन स्थळी समीरने पुन्हा किरणला मारहाण केली. तो तिला ठार मारणार एवढ्यात तीन महिला तेथून जात होत्या. त्यांनी समीरला हटकले. 'कुछ नही, पर्सनल मॅटर हैं' असे म्हणत त्याने महिलांना तेथून जायला सांगितले. याचदरम्यान गुन्हेशाखा पोलिसांचा ताफा तेथे पोहोचला.