जमीन घोटाळ्याचा आरोप करणाऱ्या पत्रकारासह अन्य दोघाविरुद्ध गुन्हा दाखल 

वेब टीम लखनऊ : अयोध्या जमीन घोटाळा प्रकरणाला उत्तर प्रदेश पोलिसांच्या कारवाईनं वेगळं वळण दिलंय. अयोध्य राम मंदिर ट्रस्टचे सचिवचंपत राय यांच्यावर आणखीन एका जमीन घोटाळ्याचा आरोप करणाऱ्या एका पत्रकारा विरोधात बिजनौर जिल्ह्यात गुन्हा दाखल करण्यात आलाय.

उत्तर प्रदेश पोलिसांनी बिजनौर जिल्ह्यात राम मंदिर घोटाळ्याचा आरोप करणाऱ्या एक पत्रकारासहीत आणखी दोघांविरोधात भारतीय दंड संहितेच्या कलम १५ नुसार तसंच आयटी अधिनियमाच्या तीन कलमांतर्गत गुन्हा दाखल केला आहे. विश्व हिंदू परिषदेचे नेते आणि चंपत राय यांच्या भावानं केलेल्या तक्रारीच्या आधारावर हा गुन्हा दाखल करण्यात आला आहे.

चंपत राय यांचे भाऊ संजय बन्सल यांच्या तक्रारीच्या आधारावर दाखल करण्यात आलेल्या एफआयआरमध्ये पत्रकार विनीत नारायण तसचं अलका लाहोटी आणि रजनीश या तिघांच्या नावाचा उल्लेख करण्यात आला आहे. चंपत राय यांच्यावर खोटे आरोप करण्यासाठी कट रचणं तसंच 'देशभरातील कोट्यवधी हिंदुंच्या भावानांना धक्का' लावण्याचा तक्रारीत आरोप करण्यात आला आहे.

अनिवासी भारतीयाची जमीन हडपली?

तीन दिवसांपूर्वी पत्रकार विनीत नारायण यांनी एका फेसबुक पोस्टमध्ये चंपत राय यांच्यावर बिजनौर जिल्ह्यात आपल्या भावांसहीत जमीन घोटाळ्यात मदत केल्याचा आरोप केला होता. अनिवासी भारतीय अलका लाहोटी यांच्या मालकीच्या एका गौशाळेची २० हजार वर्ग मीटर भूमी गिळंकृत करण्यासाठी चंपत राय यांनी आपल्या भावांची मदत केल्याचं नारायण यांनी या पोस्टमध्ये म्हटलं होतं. लाहोटी या २०१८ सालापासून आपल्या जमिनीवर अनधिकृतरित्या ताबा मिळवणाऱ्यांना हटवण्याचा प्रयत्न करत आहेत. तसंच यासाठी त्यांनी मुख्यमंत्री योगी आदित्यनाथ यांच्याकडेही मदतीची मागणी केली होती.

मुख्यमंत्र्यांकडून चंपत राय 'क्लीन चीट'

उल्लेखनीय म्हणजे, मुख्यमंत्री योगी आदित्यनाथ तसंच बिजनौर पोलिसांकडून अयोध्या जमीन घोटाळ्या प्रकरणी प्राथमिकदृष्ट्या चौकशीच्या आधारावर चंपत राय आणि इतरांना 'क्लीन चीट' देण्यात आलीय.राय यांच्याकडून तक्रार दाखल झाल्यानंतर बिजनौर पोलीस प्रमुखांनी ट्विटरवर एक व्हिडिओ पोस्ट केला आहे. यामध्ये ते संजय बन्सल यांच्या तक्रारीचं समर्थन करताना दिसत आहेत. सोबतच, पोलिसांची टीम या प्रकरणाची चौकशी करत असल्याचंही त्यांनी म्हटलंय.