रामदेवबाबांवर १००० कोटींचा दावा दाखल करणार : आय एम ए  

वेब टीम  नवी दिल्ली : उत्तराखंड 'इंडियन मेडिकल असोसिएशन'नं योगगुरू बाबा रामदेव यांना १००० कोटींची मानहानीची नोटीस धाडलीय. रामदेव यांनी 'ॲलोपॅथी' संदर्भात केलेल्या वक्तव्यांवरून आयएमए नाराज आहे.

येत्या १५ दिवसांत योगगुरु रामदेव यांनी लेखी माफी मागवी तसंच व्हायरल झालेल्या वक्तव्यांबद्दल प्रतिवाद करणारा व्हिडिओ पोस्ट करावा, अशी मागणी आयएमएकडून करण्यात आलीय. रामदेव यांनी माफी न मागितल्यास त्यांच्यावर १००० कोटींचा दावा दाखल केला जाईल, असंही आयएमएनं म्हटलंय.

आयएमए उत्तराखंडचे प्रदेश सचिव डॉ. अजय खन्ना यांच्याकडून मंगळवारी रामदेव यांना सहा पानांची नोटीस धाडण्यात आलीय. रामदेव यांच्या वक्तव्यामुळे आयएमए उत्तराखंडशी निगडीत दोन हजार सदस्यांची मानहानी झाल्याचं, त्यांनी या नोटिशीत म्हटलंय. एका डॉक्टर सदस्याच्या मानहानी साठी ५० लाख यानुसार एकूण एक हजार कोटी रुपयांचा मानहानीचा दावा दाखल करण्यात येईल, असा उल्लेख त्यांनी आपल्या नोटिशीत केलाय.

बाबा रामदेव यांच्या व्हायरल झालेल्या व्हिडिओतून त्यांनी ॲलोपॅथी उपचार करणाऱ्या डॉक्टरांच्या प्रतिमेला धक्का देण्याचा प्रयत्न केला. त्यामुळे त्यांच्यावर मानहानीचा दावा दाखल करण्याखेरीज त्यांच्यावर एफआयआरही दाखल करण्यात येईल, असंही खन्ना यांनी म्हटलंय.

सोबतच ही नोटीस मिळाल्यानंतर ७६ तासांच्या आत करोनावर रामबाण उपाय म्हणून प्रचार केल्या जाणाऱ्या 'कोरोनिल'च्या सगळ्या भ्रम निर्माण करणाऱ्या जाहिराती सगळ्या प्लॅटफॉर्मवरून हटवण्यात याव्यात, अशीही मागणी आयएमएनंत केलीय.

रामदेव यांच्याविरोधात गुन्हा दाखल करण्यासाठी आणि कारवाईसाठी लवकरच मुख्यमंत्र्यांची भेट घेणार असल्याचंही आयएमएनं म्हटलंय.

याअगोदर, ॲलोपॅथी उपचार हा मूर्खपणा आणि वैज्ञानिक दिवाळखोरी आहे. ॲलोपॅथीमुळे अनेकांनी जीव गमावले, असं म्हणताना बाबा रामदेव यांचा व्हिडिओ व्हायरल झाल्यानंतर त्यावर देशभरातील डॉक्टरांनी टीका केली होती. या प्रकरणात आरोग्यमंत्री डॉ. हर्षवर्धन यांनी रामदेव यांना आपलं वक्तव्य मागे घेण्याचा सल्ला देण्यात आल्यानंतर रामदेव यांनी आपल्या व्हायरल झालेल्या वक्तव्यावर शरणागती पत्करत 'भावना दुखावल्या असतील तर खेद' व्यक्त करत वक्तव्य मागे घेत असल्याचं जाहीर केलं होतं. तर 'आपलं वक्तव्य माघारी घेत रामदेव यांनी आपल्या परिपक्वतेचं उदाहरण दिल्याचं' सांगत आरोग्यमंत्री डॉ. हर्षवर्धन यांनीही या प्रकरणात सारवासारव करण्याचा प्रयत्न केला होता.