बँक खात्यात भरल्या बनावट नोटा 

वेब टीम मुंबई : पैसे भरण्यासाठी लावलेल्या सीडीएमए मशीनमधूनच बँक खात्यामध्ये चक्क बनावट नोटा भरण्यात आल्याचा प्रकार समोर आला आहे. फोर्ट येथील स्टेट बँक ऑफ इंडियाच्या वतीने लावलेल्या मशीनमध्ये ५०० रुपयांच्या तब्बल ३७ बनावट नोटा सापडल्या. सीसीटीव्ही फुटेज आणि बँक तपशील या आधारे बनावट नोटा जमा करणाऱ्या मोहम्मद फैज याच्यावर गुन्हा दाखल केला आहे.

स्टेट बँक ऑफ इंडियाच्या फोर्ट येथील शाखेबाहेर एटीएम मशीनबरोबरच पैसे भरण्यासाठी सीडीएमए मशीन लावण्यात आले आहे. बँकेचे अधिकारी आणि कर्मचारी मशीनमध्ये असलेली रक्कम काढून ती बँकेत जमा केली जाते. त्यानुसार १५ आणि १६ एप्रिल या दोन दिवसांत जमा झालेली रक्कम काढण्यासाठी बँकेच्या कर्मचाऱ्यांनी १७ एप्रिल रोजी सकाळी सीडीएमए मशीन उघडली. पैसे काढत असताना काही नोटा मशीनमधील रिजेक्ट बॉक्समध्ये पडलेल्या आढळल्या. कर्मचाऱ्यांनी नोटा पहिल्या तर ५०० रुपयांच्या ३७ नोटा होत्या. या नोटा बनावट असल्याचे समोर आले.

बँकेमार्फत चौकशी सुरू असताना, फैज याने नातेवाईकाच्या खात्यामध्ये पैसे भरले परंतु ते जमा झाले नसल्याची तक्रार दिल्याचे आढळून आले. त्यावरून त्याच्याकडून बँक खात्याचा तपशील घेतला तसेच पैसे जमा करतानाचे सीसीटीव्ही फुटेज तपासले. यामध्ये बनावट नोटा फैजनेच जमा केल्याचे निदर्शनास आले. बँकेच्या वतीने याबाबत माता रमाबाई आंबेडकर मार्ग पोलिस ठाण्यात तक्रार करण्यात आली असून त्याने या नोटा आणल्या कुठून याचा तपास पोलीस करत आहेत.