केंद्राकडून लसीकरण ,ऑक्सिजन संबधीत उपकरणांवरील सीमा शुल्कात कपात 

वेब टीम नवी दिल्ली : करोना लसीकरणासाठी वापरल्या जाणाऱ्या लसींवर, मेडिकल ऑक्सिजन आणि संबंधित उपकरणांवरसीमा शुल्क माफ करण्यात आल्याची घोषणा केंद्राकडून करण्यात आलीय. सोबतच करोना लसींवर लागणाऱ्या सीमा शुल्कातही कपात करण्यात आलीय. 

देशात ऑक्सिजन तुटवड्याचं संकट जाणवत असताना १ मे पासून १८ वर्षांवरील सर्व नागरिकांना लसीकरण मोहिमेत सहभागी होता येणार आहे. याआधी केंद्रानं सीमा शुल्क माफ करण्याचा निर्णय जाहीर केलाय.

सध्या सरकारकडून परदेशातून येणाऱ्या लसींवर १० टक्के सीमा शुल्क किंवा आयात शुल्क आणि १६.५ टक्के आय-जीएसटी तसंच सामाजिक कल्याण सेस लावला जातो. या करांच्या ओझ्यामुळे आयात करण्यात आलेल्या लसींची किंमत सीरम इन्स्टिट्युट ऑफ इंडियाच्या 'कोव्हिशिल्ड' आणि भारत बायोटेकच्या 'कोव्हॅक्सिन' लसींहून कित्येक पटीनं वाढते. परंतु, सरकारनं घेतलेल्या या निर्णयामुळे लसींच्या किंमतीवर नियंत्रण राहण्यास मदत होईल.

ऑक्सिजन तुटवड्यामुळे देश मोठ्या कठिण प्रसंगातून वाटचाल करत आहे. केंद्र आणि राज्य सरकार ऑक्सिजनसाठी धडपड करत असताना अनेक रुग्णालयांत ऑक्सिजनच्या कमतरतेमुळे रुग्णांनी प्राण सोडल्याच्या घटना घडत आहेत. खास 'ऑक्सिजन एक्सप्रेस' रेल्वे ठिकठिकाणी ऑक्सिजनचा तुटवडा भरून काढण्यासाठी वापरल्या जात आहेत. अशा वेळी ऑक्सिजनसंबंधित कोणत्याही उपकरणावर सीमा शुल्क हटवत ती थेट गरजवंतांपर्यंत पोहचवण्याचा मार्ग सरकारनं मोकळा केलाय.

तसंच लसीकरण मोहिमेत देशातील जास्तीत जास्त नागरिकांना सहभागी करून घेण्यासाठी राज्य, खासगी रुग्णालय आणि औद्योगिक संस्थांनाही थेट लस विक्रेत्यांकडून लस खरेदी करण्याची परवानगी देण्यात आलीय.