पोलीस काईवाई होणार असल्याची कल्पना येताच राज कुंद्रानं केली होती 'प्लॅन बी'ची तयारी

पोलीस काईवाईची कल्पना येताच राज कुंद्रानं केली होती 'प्लॅन बी'ची तयारी

वेब टीम मुंबई: पॉर्नोग्राफी प्रकरणात अडकलेल्या राज कुंद्राच्या व्हॉट्सअॅप चॅटमधून नवेनवे खुलासे होताना दिसत आहेत. राजचे चॅट्स पाहिल्यावर असं लक्षात येतं की, आपल्यावर पोलीस कारवाई होऊ शकते याची त्याला अगोदरच कल्पना होती. त्यामुळे त्यानं प्लॅन बी आखला होता. सोमवारी रात्री उशीरा झालेल्या अटकेनंतर मंगळवारी राज आणि त्याचा सहकारी रायन थार्प यांना न्यायालयात हजर करण्यात आल्यावर न्यायालयानं २३ जुलै पर्यंत त्यांची रवानगी तुरुंगात केली आहे. तर दुसरीकडे मुंबई पोलीस राजच्या विरोधात पुरावे गोळा करत आहे. अशात राजच्या व्हॉट्सअॅप चॅटमध्ये धक्कादायक खुलासे झाले आहे. पॉर्नोग्राफीच्या केसमध्ये अडकेलल्या राज कुंद्रानं त्याचं 'हॉटशॉट अॅप' सस्पेंड झाल्यानंतर प्रदीप बक्षीसोबत व्हॉट्सअॅपवर झालेल्या संवादात 'प्लॅन बी'चा उल्लेख केला होता.

मुंबई क्राइम ब्रांचनं सोमवारी रात्री बराच काळ झालेल्या चौकशीनंतर राज कुंद्राला अटक केली. पोलिसांनी राज कुंद्राचा एक्स पीए उमेश कामथच्या मोबाईलची तपासणी केल्यानंतर त्यात राज कुंद्राचे अनेक चॅट्स मिळाले आहेत. ज्यातून आपल्यावर पोलीस कारवाई होऊ शकते याचा अंदाज राजला पूर्वीच आला असल्याचं स्पष्ट होतं. तपासात समोर आलेल्या चॅट्समध्ये 'एच अकाउंट्स' नावाचा एक ग्रुप आहे. ज्यात प्रदीप बक्षीनं मागच्या वर्षी नोव्हेंबरमध्ये 'हॉटशॉट अॅप' गुगलनं सस्पेंड केल्याचं म्हटलं आहे. यासोबत नियमांकडे दुर्लक्ष केल्यानं असं झाल्याचंही त्यानं सांगितलं होतं. ज्यावर उत्तर देताना राज कुंद्रा म्हणाला होता की, 'हरकत नाही प्लॅन बी सुरू झाला आहे. जास्तीत जास्त २-३ आठवड्यात नवीन अॅप्लिकेशन लाइव्ह होणार आहे.'

राज कुंद्राच्या या 'प्लॅन बी'चं नाव बोलिफेम असं होतं. या दरम्यान उमेश कामथ आणि राज कुंद्रा यांचं आणखी एक चॅट समोर आलं आहे. ज्यात राजनं त्याच्या पीएला एक न्यूज आर्टिकल पाठवलं होतं. ज्यात पॉर्न व्हिडीओ प्रसारित करणाऱ्या ७ ओटीटी प्लॅटफॉर्म्सच्या मालकांना मुंबई पोलीस नोटीस पाठवू शकते असं म्हटलं गेलं.

यासोबतच राज कुंद्रानं त्याला 'बरं झालं आपण बोलिफेमची तयारी केली' असाही मेसेज पाठवला आहे. राज कुंद्राच्या मेसेजला उत्तर देताना उमेश कामथनं 'ऑफिसमध्ये आल्यावर बोलू. पण तोपर्यंत आपल्याला एक्सट्रीम बोल्ड कन्टेट काढून टाकायला हवा' असा मेसेज केला होता. त्यावर राज कुंद्रा म्हणतो, 'मला शंका आहे की, याने काही फरक पडेल' ज्यानंतर उमेश त्याला, 'हे एवढं गंभीर नाहीए. ते लोक फक्त आक्षेपार्ह कन्टेट काढून टाकण्यास सांगत आहेत.' असा मेसेज करतो.

उमेश कामथ पुढे राज कुंद्राला सांगतो की, सध्या या चित्रपटातून प्रत्येक दिवसाचं रिवेन्यू १५ ते २० हजारांपर्यंत होत आहे. त्यावर राज कुंद्रा त्याला 'आगामी काळात फक्त लाइव्ह कॉन्टेन्ट चालणार आहे कारण यात स्क्रीन रेकॉर्डिंग होऊ शकत नाही. त्यामुळे फार काही फरक पडणार नाही.' असं सांगतो. तसेच या चॅटमध्येच तो उमेश कामथला जुना कन्टेट लवकरात लवकर विकण्यासाठी सांगतो जेणेकरून त्यातून किमान ५० लाख रुपयांची भरपाई होऊ शकेल.

क्राईम ब्रांचच्या म्हणण्यानुसार, राज कुंद्राला पॉर्न फिल्मचं शूटिंग थांबवायचं होतं. त्याच्या जागी तो मॉडेल्स आणि अभिनेत्रींना लाइव्ह स्ट्रिमिंगवरच्या कन्टेटवर भर देण्यास सांगत होता. याची त्यानं तयारी केली होती. कारण पॉर्न फिल्म वेबसाइट आणि अॅप्सवरून काढून टाकण्यात आल्या तर लाइव्ह स्ट्रिमिंग चालू राहणार होतं. हाच त्याचा प्लॅन बी होता जे तो बोलिफेमवरून करणार होता.