छत्रसाल स्टेडियमचा सुशीलकुमार कडून गैरवापर 

वेब टीम नवी दिल्ली : सुशील कुमारच्या प्रकरणात आता दिल्ली पोलिसांना एक धक्कादायक गोष्ट सापडली आहे. सुशील कुमार एका शिक्षकाच्या मदतीमुळेच छत्रसाल स्टेडियमध्ये वाईट गोष्टी करत होता, असे आता समोर आले आहे.

सुशील कुमारचा छत्रसाल स्टेडियम हा एक मोठा अड्डा होता, असे म्हटले जाते. या स्टेडियमध्ये जे काही करायेच असेल त्यासाठी सुशील कुमारला एक शिक्षक मदत करत होते. धक्कादायक गोष्ट म्हणजे या शिक्षकाला तिथे नोकरीला सुशील कुमारनेच ठेवलेले होते. कारण अजय हा सुशील कुमारचा जवळचा मित्र होता आणि त्याला एक चांगली नोकरी मिळावी, यासाठी सुशील कुमारने प्रयत्न केले होते. छत्रसाल स्टेडियमध्ये अजय हा शारीरिक व्यायाम शिकवायचा. त्याचबरोबर सुशील कुमार जेव्हा फरार झाला होता, तेव्हा अजयही त्याच्याचबरोबर होता.

सुशील कुमारला छत्रसाल स्टेडियमध्ये कोणीही विचारणारे नव्हते. सुशील कुमार जे करायचा त्यामध्ये कोणीही हस्तक्षेत करत नव्हते. त्यामुळे छत्रसाल स्टेडियम हे त्याच्यासाठी मोकळे रान होते. त्यामुळे जर कोणतीही समस्या झाली तर सुशील कुमार ती छत्रसाल स्टेडियमध्ये सोडवत होता. त्याचबरोबर सुशील कुमार हा विवादीत प्रॉपर्टीचेही काम करत होता. यावेळी त्याची काही गँगस्टरबरोबरही संबंध आलेले होते. त्यावेळी जर दोन गटांमध्ये कोणता वाद झाला तर तो सोडवण्यासाठी सुशील या छत्रसाल स्टेडियमचा वापर करायचा. त्याचबरोबर या स्टेडिमध्ये त्याने आपल्या काही मित्रांची राहण्याचीही सोय केली होती. खेळाडू नसतानाही फक्त सुशील कुमारच्या सांगण्यावरुन त्यांना छत्रसाल स्टेडियमध्ये राहता येत होते. त्यामुळेच सागर आणि त्याच्या मित्रांना मारहाण करण्यासाठी सुशील कुमारने छत्रसाल स्टेडियम निवडले होते. कारण या ठिकाणी आपल्याला कोणतीही अडचण येणार नाही, असे सुशील कुमारला वाटत होते. ही मारहाण करत असताना कोणीही सुशील कुमारला पाहिले नाही. फक्त सुशील कुमारच्या मित्राने बनवलेला व्हिडीओमध्येच सुशील कुमार मारहाण करताना दिसत आहे आणि तोच सुशील कुमारविरोधात महत्वाचा पुरावा आहे.